Kjúklingasalat fyrir tvo

Eftir mikinn gestagang og tilheyrandi gúmmelaði át fór maginn á mér í uppreisn... Eftir tveggja daga vanlíðan sá loks til sólar og nú er hafið smá heilsuátak á heimilinu. Hér er uppskrift af einföldu og góðu kjúklingasalati

2 kjúklingabringur skornar í bita, steikar á pönnu, bragðbætt með salt og pipar, 2 msk af mango chutney, dass af balsamic edik og svo nokkrar msk af vatni. Látið krauma þar til kjúllinn er eldaður í gegn.

1 poki rucola
hálf paprika
1 tómatur
hálft avocado
smá rauðlaukur, þunnt skorinn

Blanda smá balsamic við rucola laufin og skipti því svo á 2 diska. Dreifi svo hinu grænmetinu yfir og skelli svo kjúllanum ofan á allt saman. Bjó svo til dressingu úr sýrðum rjóma, appelsínusafa og balsamic. Við hjón notum samt svo litla dressingu að það tekur því varla að búa hana til, þannig við höfum sennilega bara salatdressingu úr flösku með næst.

Saga

Saga sæta er alltaf að stækka. Nýjasta nýtt er að það er farið að örla á meira hári á höfðinu á henni og ku hún vera ljóshærð einsog pabbi sinn. Að öðru leiti er hún alveg einsog ég, það er að segja hún elskar allt sem er doppótt og getur sofnað í furðulegustu stellingum.





Saga er orðin mjög fær í að smakka á alls kyns dóti en kann samt ekki ennþá að setja sjálf upp í sig snuð.


Hún er vaxin upp úr ísbjarnarbúningnum góða mömmu hennar til mikillar mæðu, en þetta er án efa krúttlegasta flík allra tíma og er í stærð 3-6 mánaða þannig að litla dúllan er greinilega að flýta sér fullmikið að stækka...


Saga er orðin afar hrifin af hundinum okkar. Hann heitir Pjakkur og lætur fara afskaplega lítið fyrir sér. Kannski fær Saga lifandi Pjakk þegar hún verður stærri, fer allt eftir því hvar við ákveðum að búa.


Saga er svo mikil pæja að hún er alltaf í kjól um helgar, því þá fer hún í DJ þjálfun hjá pabba sínum og þá er mikilvægt að vera flott í tauinu. Þennan kjól fékk hún frá Kötu vinkonu, en hún sjálf á einmitt von á litlu krílí í apríl :)


Svo er hún orðin voða stór og situr bara út í horni og leikur sér. Mamma er samt aldrei langt undan því maður á það svona til að síga aðeins... og þá þarf björgun.


Okkur Sögu hálfleiðist stundum hérna í Eindhoven þannig við erum búnar að ákveða að koma í auka orlof til Íslands í febrúar og vera í rúmar tvær vikur. Ég held nú að ömmunum, öfunum, langömmunum og langöfunum leiðist það nú ekkert, að fá að sjá litla skottið aðeins oftar.

Hafið þið séð bjórhjólakaffihús???

Nei hélt ekki....

Við litla familían vorum að viðra okkur í sunnudagsgöngu. Allt í einu komum við auga á hið furðulegasta apparat mannað nokkrum ansi hressum ungum mönnum með bjór í hönd.

Hollendingar eru spes... myndir hér.

Annað skrítið sem ég hef tekið eftir er að þeir fara á kaffihús og panta sér brauð með osti. Halló!!! Brauð með osti er hallærisnesti sem maður tekur með þegar það er ekki til neitt betra. Hefur þetta lið aldrei heyrt um Super Nachos eða súkkulaðiköku??? Eitthvað svona sem er meira við hæfi að splæsa á sig á kaffihúsi... Furðulegt fólk!

Allt er vænt sem vel er grænt...

... er sérstaklega satt þegar kemur að fallega eldhúsljósinu mínu (sem er reyndar inni í stofu því þar borðum við). Nýverið rakst ég á gasalega flott ljós á bloggi nokkru, síðan þá hef ég eytt ófáum stundum í að leyta uppi svona ljós. Komst svo loksins að því að þau voru einu sinni seld í Cath Kidston en ekki til lengur. Hvað gera bændur þá?

Nú maður hjólar í ikea og kaupir svona skrípi úr burstuðu stáli. Síðan kaupir maður sprey og grunn og blikkar augunum fallega til eiginmannsins sem fer svo út og spreyar af öllum lífs og sálarkröftum þar til frúin er sátt.


Jeminn hvað mér finnst fínt hjá mér núna. Og jeddúdamía hvað ektamaðurinn er nú fær í að framkalla það sem mér dettur í hug.

Sumarið

Það hefur verið lítill tími fyrir skrif síðustu mánuðina en nú er að róast hjá okkur þannig hér fer að verða líf að nýju. Best að starta haustinu með því að gera sumrinu skil í máli og myndum.

Í upphafi sumars var frúin ansi blómleg og ekkert sérlega frá á fæti


Garðar var upptekinn við að klára lokaverkefnin í Central Saint Martins


Síðan kom 25. júní og þá fæddist hún Saga, litli sólargeislinn okkar


Sú stutta dafnaði vel fyrsta mánuðinn og fékk góða gesti í heimsókn




Síðan útskrifaðis Garðar með BA í vöruhönnun


Þegar Saga var 5 vikna þá fluttum við úr íbúðinni okkar á Oakley Road og fórum til Íslands


Öll familían var voða fegin að fá loksins að knúsa Sögu







Saga var skírð í Haukadalskirkju þann 15. ágúst


Garðar nýtti tímann á Íslandi til að búa til einn hlutinn sinn... meira um það síðar...


Þann 24. ágúst fluttum við til Eindhoven og höfum síðan þá verið að dunda við að gera heimilslegt hjá okkur





Skólinn hjá Garðari hófst 1. september. Námið leggst vel í hann og við erum bara spennt fyrir framhaldinu. Ég er byrjuð á hollensku námskeiði og málið virðist nú ekkert svo flókið við fyrstu sín þó framburðurinn sé frekar snúinn.

Nú þykist ég búin að gera sumrinu smá skil, á næstunni mun gæta ýmissa grasa hér á blogginu... Ég er að vinna í sérstakri færslu um undur Hollands, þar að auki má vænta nokkurra færslna um hvað mallar í pottunum hér á Kronehoefstraat, svo þarf ég nú að pósta nokkrum myndum af íbúðinni þegar allt er orðið fínt og síðast en ekki síst þá verða reglulega fréttir af Sögu sætu.

Nederland...

Jæja nú er litla fjölskyldan komin til Hollands. Saga litla hefur nú afrekað það að búa í þremur löndum á fyrstu tveimur mánuðum ævi sinnar... Bretland - Ísland - Holland (athugið að þetta tengist Icesave ekki neitt!)

Koman hingað lukkaðist ekki betur en svo að leigusalinn reyndist vera í fríi og engin leið að nálgast lyklana að íbúðinni. Við byrjuðum því á því að hangsa á McDonalds og í verslunarmiðstöð nokkurri. Sem betur fer vorum við með bílaleigubíl og vagninn hennar Sögu í skottinu. Síðan um fimmleytið næ ég loksins sambandi við manninn sem reyndist vera í Frakklandi, hann spurði hvort það nægði að fá lyklana morguninn eftir!!! Uhhh NEI eiginlega ekki sko. Þannig að 10 mínútum síðar fengum við loks lyklana :)

Næsti dagur nýttist vel. Byrjuðum á að kaupa þvottavél. Síðan fórum við í IKEA og vorum þar það sem eftir lifði dags. Keyptum fataskápa, rúm og skiptiborð.

Nú sit ég hérna innan um kassana og blogga, Garðar með flensu og Saga sofandi. Skáparnir eru hér um bil komnir upp, vantar að skrúfa á hurðirnar og fataslánna í hinn. Ekkert eldhúsborð eða stólar, sófinn væntanlegur eftir um það bil viku... þetta gengur frekar hægt en verður vonandi orðið fínt þegar fyrstu gestirnir koma í október. Ég mæli sumsé ekkert sérlega með því að standa í svona stórflutningum með lítið barn.

Það er eitt frekar skrítið hérna í Hollandinu. Búðir og veitingastaðir hafa oft frekar sérstakan opnunartíma... Gluggabúðin hérna niðri er til dæmis lokuð á mánudögum (þess vegna var erfitt að nálgast lyklana þegar við komum), ein búð með notuð húsgögn sem við ætluðum að kíkja í bara opin frá tíu til eitt á laugardögum, svo eru margir veitingastaðir bara opnir fimmtudag til mánudags... þetta finnst mér svolítið spes.

Í samanburði við London þá hefur Eindhoven allavega vinninginn á einu sviði: Bakarí!!! Hér eru girnileg bakarí, eitthvað sem er ekki á hverju strái í Tjallalandi.

Nýr fjölskyldumeðlimur

Það er margt búið að gerast síðan síðast. Saga Garðarsdóttir, litla krúttið okkar kom í heiminn 25. júní og hefur haldið okkur við efnið síðan þá. Hún er algjört æði og er matargat einsog foreldrarnir. Ljósmóðirin okkar var í heimsókn og sú litla er búin að þyngjast um 400 grömm á 6 dögum, en síðast þegar hún var mæld hafði hún tapað 200 grömmum af fæðingarþyngdinni. Mömmurjóminn er augljóslega að skila sér og foreldrarnir voru greinilega ekki bara að ímynda sér stækkandi bollukinnar á barninu.

Eintóm hamingja á þessum bæ. Við erum með myndasíðu hér. Endilega hafið samband við okkur á facebook eða í tölvupósti til að fá lykilorðið.